На Скідзельскай шашы, 2Б у Гродне плануюць пабудаваць адміністрацыйна-гандлёвы будынак. На першым паверсе размесцяць чатыры гандлёвыя памяшканні з асобнымі выхадамі на вуліцу, на другім і трэцім — офісы. Грамадскае абмеркаванне праекта пройдзе з 21 кастрычніка па 4 лістапада.
Участак плошчай 0,7589 гектара знаходзіцца каля аўтамабільнай газанапаўняльнай кампрэсарнай станцыі. Паведамленне пра абмеркаванне архітэктурна-планіровачнай канцэпцыі апублікаваў гарвыканкам.
Заказчык праекта — ТАА «НТП-Синтез», распрацоўшчык — гродзенскае ТАА «Амаронпроект».
Якім будзе будынак
Будынак запраектаваны з плоскім дахам і дзвюма лесвічнымі клеткамі. На верхніх паверхах, акрамя адміністрацыйных кабінетаў, прадугледжаныя санвузлы.
Тэрміны будаўніцтва і будучыя арандатары ў паведамленні не пазначаныя.
Як паглядзець праект і выказаць меркаванне
Экспазіцыя будзе адкрытая з 21 кастрычніка па 4 лістапада ў вестыбюлі ўпраўлення будаўніцтва, архітэктуры і горадабудаўніцтва па адрасе: плошча Антонія Тызенгаўза, 3. Наведаць яе можна па буднях з 8:00 да 13:00 і з 14:00 да 17:00.
Прэзентацыя праекта будынка адбудзецца 28 кастрычніка ў 15:00 па тым жа адрасе, у кабінеце №1 на першым паверсе.
Заўвагі і прапановы прымаюцца з 21 кастрычніка па 4 лістапада з пазнакай «грамадскае абмеркаванне»:
- па электроннай пошце: [email protected] або [email protected];
- пісьмова: 230023, Гродна, плошча Леніна, 2/1;
- пісьмова ва ўпраўленне будаўніцтва, архітэктуры і горадабудаўніцтва: 230023, Гродна, плошча Антонія Тызенгаўза, 3.
Таксама можна пакінуць свае заўвагі і прапановы ў журнале ўліку наведвальнікаў экспазіцыі.
Усе прапановы разгледзяць на гарадскім архітэктурна-горадабудаўнічым савеце, затым матэрыялы перададуць камісіі па грамадскім абмеркаванні. Вынікі апублікуюць на сайце grodno.gov.by да 21 лістапада 2026 года.
