Краму сувенірнай прадукцыі «Калядная крама» у Мінску закрылі пасля скаргаў Вольгі Бондаравай. Праўладная актывістка абвінавачвала краму ў продажы тавараў «з выявай нацысцкай злачынцы» Ларысы Геніюш.
Цяпер у дачыненні да юрасобы крамы вядуць крымінальна-працэсуальную праверку, паведаміла ў сваім Telegram-канале Бондарава.
Згодна з адказам адміністрацыі Савецкага раёна Мінска на заяву Бондаравай, праца «Каляднай крамы» прыпыненая, а памяшканне закрытае з 15 лістапада. У анлайн-каталогу магазіна органы не знайшлі шарыкаў з выявай Геніюш.
Адміністрацыя раёна запатрабавала ад крамы ўхіліць парушэнні «аб продажы асобных тавараў», выяўленыя падчас праверкі. Да 21 лістапада крама выканала патрабаванне.
Крама зачынялася на два дні — 16 і 17 лістапада. Тады ў Instagram з’явілася аб’ява, што крама «часова не працуе па тэхнічных прычынах». Гэта адбылося пасля таго, як прапагандысты абурыліся продажам ёлачных шарыкаў з выявай Ларысы Геніюш.
Бондарава назвала паэтку «нацысцкай злачынцай» і падала заяву ў міліцыю — шарыкі знялі з продажу.
Пазней стала вядома, што працай магазіна зацікавілася пракуратура Савецкага раёна Мінска, якая «падчас маніторынгу ў сетцы Інтэрнэт выявіла прапановы да набыцця ў адным з магазінаў сталіцы прадукцыі, звязанай з рэабілітацыяй нацызму, і запатрабавала выключыць яе з продажу».
Таксама ў пракуратуры адзначылі, што ёлачныя шарыкі з’яўляюцца прадукцыяй уласнай вытворчасці арганізацыі — уладальніка магазіна.
У выніку намеснік пракурора Савецкага раёна Мінска ўнёс на адрас дырэктара «прадпісанне аб ліквідацыі парушэнняў заканадаўства аб недапушчэнні рэабілітацыі нацызму» і запатрабаваў ліквідаваць парушэнні і больш не прадаваць шарыкі. Прадпісанне было выканана.
Акрамя гэтага, як паведамляецца, па даручэнні пракуратуры раёна органамі ўнутраных спраў праводзіцца даследчая праверка.
Чытайце таксама: «Гродзенская праўда» выдаліла тэкст пра гарэлку ад навукоўцаў. На яе паскардзілася Бондарава
