У Беларусі плануюць стварыць мабільны дадатак для рэгістрацыі ў электроннай чарзе перад уездам у аўтадарожныя пункты пропуску. Распрацаваць яго збіраюцца да канца 2026 года.
Пра гэта ў эфіры тэлеканала «Беларусь 1» расказаў старшыня Дзяржаўнага мытнага камітэта Уладзімір Арлоўскі, паведамляе БЕЛТА.
Дадатак дазволіць зарэгістравацца ў электроннай чарзе непасрэдна з тэлефона. Карыстацца ім змогуць як кіроўцы легкавых аўтамабіляў і аўтобусаў, так і грузаперавозчыкі.
Цяпер зарэгістравацца можна праз сайт
Аддаленую рэгістрацыю ў электроннай чарзе ўвялі ў 2026 годзе. Цяпер для гэтага неабходна стварыць асабісты кабінет на сайце «Белмытсэрвісу». Там можна зарэгістраваць транспартны сродак у жывой чарзе або забраніраваць дату ўезду ў пункт пропуску.
Паводле слоў Арлоўскага, мабільны дадатак павінен зрабіць рэгістрацыю зручнейшай. Як ён будзе называцца і на якіх платформах з’явіцца, пакуль не паведамляецца.
Кіраўнік ДМК таксама заявіў, што каля пунктаў пропуску працягваюць уладкоўваць пляцоўкі чакання. Паводле яго слоў, чэргі ўзнікаюць у тым ліку праз «нерытмічную працу» кантрольных службаў суседніх дзяржаў.
Будуюць зону чакання
Раней паведамлялася, што новыя зоны чакання з электроннай чаргой з’явяцца каля трох пунктаў пропуску на мяжы з Еўрасаюзам: «Бераставіцы» на польскім напрамку, «Грыгароўшчыны» на мяжы з Латвіяй і «Каменнага Лога» на літоўскім напрамку.
Будаўніцтва пляцоўкі каля «Бераставіцы» збіраюцца завяршыць да канца 2026 года. Работы каля «Грыгароўшчыны» планавалі скончыць у 2027 годзе. Асобную зону чакання каля «Каменнага Лога» маюць намер пачаць будаваць у 2027 годзе.
