Аднапакаёвая кватэра-студыя знаходзіцца на даху 11-павярховага дома на Савецкіх Пагранічнікаў. Прапанова аб продажы жылля з’явілася на платформе «Юриэлт».
Невялікая кватэра плошчай 29, 4 кв. м. знаходзіцца на тэхнічным паверсе дома па вуліцы Савецкіх Пагранічнікаў, 120. У аб’яве прадавец адзначае, што ў студыі ёсць уласная зашклёная тэраса плошчай 10 кв. м. – з яе адкрываецца від на горад, «а ў пагодны дзень бачная польская і літоўская мяжа».
Кватэра ўкамплектавана бытавой тэхнікай і мэбляй, нерухомасць узаконена. У катэджы зрабілі капітальны рамонт. «Суседзі: сонца, зоркі і аблокі», – пішуць у аб’яве.
За катэдж на даху дома просяць 200,8 тыс. руб., кошт аднаго квадратнага метра ў кватэры – крыху больш за 6,8 тыс. руб.
Катэдж размешчаны на даху аднаго з дамоў з «сінім дахам» — так некаторыя гродзенцы называюць дамы на Савецкіх Пагранічнікаў 114, 116/1 і 120. Панэльныя дамы пабудавалі ў канцы 90-х, а іх адметнай рысай сталі невялікія сінія «вежкі», размешчаныя на тэхнічных паверхах.
Па тэме: У Гродне можна зняць офіс нават на даху. Вось як ён выглядае
Журналісты Onliner.by наведалі катэдж на Савецкіх Пагранічнікаў. Згодна з атрыманай імі інфармацыяй, з 2014 года кватэрай валодае жыхарка Гродна Ірына.
Першапачаткова праект прадугледжваў, што катэдж будуць выкарыстоўваць як майстэрню мастака з асобным уваходам і лесвіцай, таму ўсе камунікацыі былі закладзены адразу. Жыць у такой кватэры можна круглы год.
Праўда, у катэджа ёсць асаблівасць – вокны выключна мансардныя, затое з іх адкрываецца від на неба. Таксама ўнутры кватэры няма сцен – прастора зануецца невялікімі прыступкамі.
Замест двара ў катэджы – дах дома.
— Ёсць ключ ад выхаду на дах, але гэта хутчэй магчымасць часам выйсці і атрымаць асалоду ад краявідаў, чым прастора для рэгулярнага адпачынку. Але вядома, пікнікі і барбекю на даху рабіць не атрымаецца, – кажа Ірына.
Нерухомасць прадаюць, таму што ўласнік мае патрэбу ў грошах.
Чытайце таксама: У Гродне зноў прадаюць маёмасць асуджанага бізнесмена
