Будынак 1931 года пабудовы на Савецкіх пагранічнікаў, 17 адрэстаўравалі і выставілі на продаж. Унутры можна адкрыць офісы, рэстаран ці кафэ, медустанову або салон прыгажосці. Суседні такі ж будынак знеслі.
Як змяніўся будынак
Цагляны двухпавярховы будынак месціцца недалёка ад былога басейна «Лазурны». Ён быў збудаваны ў стылі позняй эклектыкі з элементамі канструктывізму, пісаў канал Urban Hrodna. Надпіс «A 1931 S», які захаваўся на карнізе, пакінулі, ён стаў бачным больш выразна. Агароджу балконаў і ганка зрабілі на ўзор той, што была. Паміж паверхамі з’явіўся карніз, вокны павялічылі і падкрэслілі цёмнай апраўкай, дадалі дэкаратыўныя агароджы, дабудавалі мансарду. На галоўным фасадзе дабудавалі ганак з пандусам і агароджай. На дваравым — зрабілі задні выхад з невялічкай тэрасай. Вакно на галоўным фасадзе ў цантры другога паверха, якое ўраўнаважвала ўваход, знікла, таксама знікла вакно на першым паверсе на бакавым фасадзе.
Кошт пасля рэканструкцыі - амаль паўмільёна
Адрэстаўраваны будынак цалкам гатовы да выкарыстання. Унутры зрабілі дызайнерскі рамонт, цокальны паверх таксама даступны да выкарыстання.
Планіроўка — кабінетная, вышыня столяў - 3,16 м. Агульная плошча будынка — 412,2 кв.м. Ацяпленне зроблена на электрычнасці, газу няма. Санвузлы ёсць на кожным паверсе. Плошча зямельнага ўчастка пад арэнду — 2,68 сотак. Задні дворык абгароджаны, выкладзены пліткай, ёсць лавачка.
Рэканструкцыю завяршылі ў гэтым годзе. Будынак знаходзіцца ў прыватнай уласнасці. Паводле абвесткі, у яго ўжо ёсць арандатары.
Выстаўлены кошт — 1,49 млн руб. ($ 499 тыс.), але могуць і патаргавацца.
Такі самы суседні будынак знеслі
Амаль такі самы суседні будынак 1930-х гадоў па Савецкіх пагранічнікаў 17/1 знеслі цягам апошніх дзевяці месяцаў. Там пабудуюць гасцініцу.
На аб’екце ідуць падрыхтоўчыя працы: вырылі катлаван для камунікацый, залілі фундамент. Будаўніцтва пачнецца пасля таго, як прымуць праект гасцініцы. Зараз ён праходзіць экспертызу. Будынак плануюць увесці ў эксплуатацыю ў 2024 годзе. Замоўца будаўніцтва — гродзенская прадпрымальніца.
Чытайце таксама:
