Сёлета вызначылі трох кандыдатаў на Прэмію Ядкоўскага — 2019. Гэта бібліёграфка Любоў Турмасава, гісторык Мечыслаў Супрон і журналіст Руслан Кулевіч. Вырашаць, хто менавіта стане лаўрэатам, будзе рада прэміі.
Сёлетнія намінанты
Руслан Кулевіч — вядомы нашым чытачам журналіст Hrodna.life. Займаецца зборам вусных успамінаў гродзенцаў. У 2019 г. выйшла яго кніга «Горад адзін, успаміны розныя», якая змяшчае гісторыі сталых гродзенцаў і іх успаміны пра Гродна пачатку 20 стагоддзя. Зараз рыхтуецца працяг гэтай кнігі. Руслан шмат зрабіў для абароны драўлянай архітэктуры Новага свету.
Гісторык Мечыслаў Супрон актыўна змагаецца за захаванне гісторыка-культурнай спадчыны горада. На аснове здабытых ім матэрыялаў ён распрацаваў праект забудовы часткі вуліцы Замкавай з Домам Рыбака, пераканаў забудоўшчыкаў у неабходнасці маштабных раскопак у гэтым месцы (пачнуцца ў кастрычніку) і адбудове раёна максімальна блізка да гістарычнага выгляду. Мечыслаў Супрон некалькі разоў звяртаўся ў паркуратуру па іншых пытаннях, дамогся раскопак на вуліцы Вялікая Траецкая за сінагогай. Разам з даследчыкам Шчукіным ён зрабіў шэраг навуковых 3D-рэканструкцый страчаных і захаваных гродзенскіх будынкаў. Таксама Мечыслаў Супрон змагаецца за аўтэнтычнасць рэканструкцыі Старога замка ў Гродне, якая ўжо падыходзіць да другой чаргі.
Любоў Турмасава — знакамітая гродзенская бібліёграфка, намінавалася на прэмію летась. Яе праца ў аддзеле краязнаўчай літаратуры абластной бібліятэкі імя Я.Ф. Карскага далёка выходзіла за межы абавязкаў і аб’яднала аматараў краязнаўства. Шэраг «Гарадзенскіх чытанняў» — ініцыятыва Любові Турмасавай. Дзякуючы ёй штотыдзень праводзяцца творчыя сустрэчы, дыспуты, інтэлектуальныя гульні з абавязковым ўдзелам моладзі ў гарадской бібліятэцы імя А. Макаёнка.
* Гэтае галасаванне не вызначае пераможцу, а толькі збірае інфармацыю пра меркаванні чытачоў Hrodna.life.
Даведка
Прэмія імя Юзафа Ядкоўскага заснаваная ў 2012 годзе гродзенскімі гісторыкамі. Штогод яе ўручаюць тым, хто зрабіў значны ўнёсак у вывучэнне або папулярызацыю гісторыі Гродна, а таксама паспрыяў захаванню прыроднай і гісторыка-культурнай самабытнасьці Гродна і рэгіёна. У розны час прэмію атрымлівалі вядомыя гісторыкі і краязнаўцы: Андрэй Вашкевіч, Алесь Госцеў, Таццяна Касатая, Віктар Саяпін, Фёдар Ігнатовіч, Таццяна Еўдакімава, Наталля Канюк, Ігар Лапеха.
