У Гродне свята: “Нёман” перамог
Усё пачыналася як звычайна, хоць Саладоўнікаў і абяцаў перамены.
Адзінай прыкметнай зменай у складзе каманды стала замена брамніка – замест Васiлючэка на поле выйшаў Курганскі.
Апошні травеньскі дзень выдаўся гарачым.
Многія жыхары горада аддалі перавагу лецішчам, чым футболу, але каля тысячы гледачоў у пратакол гульні напэўна запішуць.
Сярод заўзятараў на трыбунах былі заўважаныя і выпускнікі школ, у якіх у гэты дзень была лінейка.
Першы тайм “Нёман” пратрымаўся, але спецыялісты і букмекеры былі настроеныя на чарговае паражэнне гарадзенскай каманды.
Аднак другі тайм паказаў гарадзенскай публіцы, што “Нёман” здатны гуляць на сваім полі зусім па-іншаму!
У другім тайме гледачы ўбачылі зусім іншую каманду: сабраную, моцную, гатовую біцца за перамогу.
Спачатку пад націскам гарадзенцаў мяч у сваю браму забіў лепшы нападнік “Граніта” Луцэвіч (на здымку ніжэй зправа).
Пад канец сустрэчы пераможную кропку паставіў Едэшка.
Бомбель і Хачатуран – вось тыя гульцы, якія зрабілі вынік сустрэчы. Годна згулялі і іншыя гульцы, у тым ліку Курганскі.
Галоўны трэнер гарадзенскага “Нёмана” Сяргей Саладоўнікаў пракаментаваў перамогу каманды над “Гранітам” такім чынам:
– Доўгачаканая перамога. Яна вельмі важная ў псіхалагічным плане.
Мне гульня спадабалася па змесце. У суперніка былі 3 моманту, у нас 3 моманту, мы забілі. Удзячны камандзе, памочнікам і лёсу за тое, што ў мяне ёсць такі капітан.
Замена Горбача звязана з яго станам здароўя. Яму стала дрэнна, лекар не дазволіў працягнуць гульню.
Чаму не замяніў Забеліна раней? Так, можа яго трэба было і раней замяніць, малады хлопец, падсеў. Але мяне задавальняюць яго якасці i яго гульня”.
Пасля перамогі над “Гранітам” “Нёман” выкараскаўся з дна турнірнай табліцы.
Спадзяемся, далей будзе яшчэ лепш.
30 траўня. “Нёман” – “Граніт” 2-0
Фота аўтара