У Гродне спыняе працу грыль-бар «Жароўня» на вуліцы 1-й Працоўнай, 2. Установа адкрылася восенню 2022 года і прапрацавала амаль чатыры гады. Пра закрыццё паведаміла каманда бара ў сваім акаўнце ў Instagram.
«Прынялі рашэнне завяршыць гісторыю»
Каманда «Жароўні» паведаміла пра закрыццё ўстановы ў сваіх сацсетках.
«Пасля доўгага шляху мы прынялі рашэнне завяршыць гісторыю „Жароўні“», — гаворыцца ў паведамленні.
Ва ўстанове падзякавалі гасцям, супрацоўнікам і партнёрам, якія былі з ёй на працягу гэтых гадоў.
«У кожнага месца ёсць свой час. І мы хочам завяршыць гэты час з удзячнасцю — без шкадавання аб пройдзеным шляху і з павагай да ўсяго, што нам удалося стварыць разам», — напісала каманда.
Прычыны закрыцця не паведамляюцца.
Гродзенцы шкадуюць аб закрыцці
У каментарыях пад паведамленнем пра закрыццё большасць карыстальнікаў пішуць, што ім шкада губляць установу. Гродзенцы згадваюць меню, абеды і атмасферу «Жароўні». Некаторыя здзівіліся рашэнню каманды і пыталіся пра прычыны закрыцця. Адзін з карыстальнікаў адзначыў, што ва ўстанове, паводле яго назіранняў, заўсёды было шмат гасцей.
«Гэта адно з маіх любімых месцаў у нашым горадзе. Заўсёды ўтульна, атмасферна і смачна. Шкада, вельмі шкада», — напісала адна з наведвальніц.
«Толькі да вас і хадзілі, вельмі шкада», — дадала іншая.
«Вельмі шкада. Дзе цяпер шукаць той маркоўны пірог?» — спытала яшчэ адна карыстальніца.
«Вельмі шкада… Дзіўна, чаму? У вас заўсёды столькі гасцей было», — гаворыцца яшчэ ў адным каментарыі.
Былі і супрацьлеглыя рэакцыі. Напрыклад, адзін з карыстальнікаў напісаў: «Нарэшце». Іншы прызнаўся, што ўпершыню чуе пра гэтую ўстанову.
Адкрыліся ў кастрычніку 2022 года
«Жароўня» адкрылася 20 кастрычніка 2022 года на вуліцы 1-й Працоўнай, 2, побач з кафэ «Одесса-мама» і барам Punkroll.
Грыль-бар спецыялізаваўся найперш на мясных стравах, прыгатаваных на грылі. Пры адкрыцці ўладальнікі апісвалі канцэпцыю так: «Мы пра грыль, мяса, вуголле, жарсць, брутальнасць і вось гэта ўсё».
Таксама ва ўстанове працаваў бар з кактэйльнай картай. У першыя тыдні «Жароўня» працавала ў тэставым рэжыме, а ўладальнікі планавалі дадаць бізнес-ланчы і сняданкі.
Грыль-бар прапрацаваў у Гродне амаль чатыры гады.
