Увечары 27 ліпеня Гродзенскую вобласць накрыла моцная навальніца з ліўнем, шквалістым ветрам і буйным градам. Больш за ўсё пацярпеў Воранаўскі раён, дзе вецер пашкодзіў дахі 140 дамоў і 10 сельскагаспадарчых пабудоў. У Гродне затапіла асобныя вуліцы і гандлёвы цэнтр OldCity, а ратавальнікі больш за 20 разоў выязджалі на прыборку паваленых дрэў.
Навальніца суправаджалася буйным градам і шкваламі
Яшчэ да пачатку непагадзі Telegram-канал Метеовайб паведамляў, што над захадам Беларусі сфармавалася небяспечная навальнічная сістэма з так званымі суперячэйкамі — адным з самых магутных відаў навальніц, якія суправаджаюцца моцнымі ліўнямі, буйным градам і разбуральнымі парывамі ветру. Папярэджвалі пра непагадзь і ратавальнікі.
Мяркуючы па ўсім, найбольш моцны ўдар стыхіі прыйшоўся на Воранаўскі раён. Тут памер асобных градзін дасягаў 3–4 сантыметраў, а парывы ветру перавышалі 20 м/с.
«Ад агародаў у Воранаўскім раёне месцамі нічога не засталося», — піша Telegram-канал Метеовайб.
«Воранаўскі раён, бачнасць 0, выгляд на дарогу, ехаць было немагчыма, град з перапёлчына яйка, я думаў, што разб’е лабавое, настолькі магутныя былі ўдары», — так апісваў адзін з беларусаў непагадзь.
У Ашмянах таксама зафіксавалі вецер хуткасцю да 20 м/с, а на ўсходзе краіны захаваліся ліўні, навальніцы і парывы ветру да 15 м/с.
Telegram-канал «Надвор’е» таксама паведамляў пра моцную навальніцу ў Гродзенскай вобласці. Паводле яго даных, у гродзенскім аэрапорце падчас непагадзі бачнасць праз дождж знізілася да 700 метраў, была моцная навальніца, а парывы ветру дасягалі 24 м/с. У раёне Ваўкавыска, па інфармацыі канала, таксама прайшлі вельмі інтэнсіўныя ападкі з градам.
Вецер пашкодзіў 140 дамоў
Як паведамілі ў МНС, праз непагадзь ратавальнікі ў Гродзенскай вобласці 25 разоў выязджалі на распілоўку і прыборку паваленых дрэў. Дапамога работнікаў МНС спатрэбілася ў пяці раёнах вобласці.
Найбольш сур’ёзныя наступствы зафіксавалі ў Воранаўскім раёне. Тут парывы ветру пашкодзілі дахі 140 жылых дамоў і 10 сельскагаспадарчых будынкаў.
У Воранаўскім раённым выканаўчым камітэце правялі пасяджэнне камісіі па надзвычайных сітуацыях. Наступствы непагадзі ліквідуюць.
Паводле аператыўнай інфармацыі, пацярпелых няма.
У Гродне затапіла вуліцы і гандлёвы цэнтр
Моцны лівень прывёў да лакальных падтапленняў у абласным цэнтры. На асобных вуліцах ліўневая каналізацыя не спраўлялася з вялікай колькасцю вады, праз што некаторыя ўчасткі дарог затапіла.
Вада дабралася і да гандлёвага цэнтра OldCity. У некаторых крамах падтапіла гандлёвыя залы — вада была ў памяшканнях і вітрынах.
Ратавальнікі папярэдзілі пра новыя навальніцы
У МНС папярэдзілі, што 28 ліпеня непагадзь можа паўтарыцца. Паводле прагнозу, месцамі па Беларусі чакаюцца навальніцы, а ўдзень у асобных раёнах парывы ветру будуць дасягаць 15–18 м/с.
Ратавальнікі нагадваюць, што моцны вецер можа прывесці да абрыву ліній электраперадачы і сувязі, адключэння электрычнасці, падзення дрэў, пашкоджання дахаў і слаба замацаваных канструкцый. Акрамя таго, узрастае рызыка прыродных пажараў і пажараў у жылых і вытворчых будынках, а таксама няшчасных выпадкаў на вадзе.
Паводле прагнозу сіноптыкаў, 28 ліпеня на большай частцы тэрыторыі краіны пройдуць дажджы, месцамі чакаюцца навальніцы. Тэмпература паветра складзе ад +17 да +23 °C.
