У Threads адна з гродзенак апублікавала некалькі аб’яў аб здачы кватэр у Гродне. Сумы на здымнае жыллё вар’іруюцца ад 1,7 да 3,5 тыс. руб. Гараджане не разумеюць, чаму кватэры каштуюць так дорага.
«Прабачце, а што адбываецца з рынкам арэнды ў Гродне. Я нешта ціха о****ю з коштаў на доўгатэрмін», – напісала гараджанка.
На пляцоўцы сапраўды прадстаўлена больш за 300 аб’яў аб здачы жылля ў Гродне. Самы дарагі варыянт знаходзіцца на вуліцы Парахавой – чатырохпакаёвую кватэру здаюць на працяглы тэрмін, а за месяц арэнды просяць 3,5 тыс. руб.
Крыху танней – за 2,8 тыс. руб. абыдзецца аднапакаёвая кватэра на праспекце Янкі Купалы. Яшчэ танней за 2 тыс. руб. можна зняць трохпакаёвую кватэру на вуліцы Пушкіна.
Адразу некалькі варыянтаў кватэр з добрым рамонтам прапануюць арандаваць за амаль 1700 руб., іх метраж вар’іруецца ад 34 да 75 квадратаў.
Чаму так дорага?
У Гродне сярэдні намінальны заробак (гэта значыць да выліку падаткаў) складае 2988 руб. З гэтай сумы адымаецца каля 13% на падаткі і выплаты ў ФСАН, таму на рукі жыхар абласнога цэнтра атрымае прыкладна 2,6 тыс. руб. ($923 па курсе Нацбанка).
Нават калі гродзенец і будзе штомесяц зарабляць такую суму, зняць жыллё за тыя ж 1700 руб. – праблематычна.
У каментарах карыстальнікі выказваюць розныя здагадкі, адкуль на гродзенскім рынку нерухомасці з’яўляюцца такія дарагія варыянты.
Адны пішуць, што гэта “расіяне дабудавалі свае кватэры”. Іншыя і ўвогуле мяркуюць, што праблема ў самім «Куфары» – нібыта на сайце зляцелі фільтры і таму платформа паказвае неадэкватныя кошты. Яшчэ адна катэгорыя гараджан лічыць, што на рост коштаў уплывае зручнае на думку гаспадара кватэры месцазнаходжанне.
«Я разумею іх кошты, усё проста нармальны рамонт і змесціва кватэры: тэхніка толькі адна чаго вартая. А як адбіць гэтыя ўсе выдаткі?», – выказваецца адна з гараджанак.
“Няма попыту на суткі ў гэтым годзе, канкурэнцыя вялікая, таму сутачнікі вырашылі паспрабаваць здаць на доўгі тэрмін за высокую цану”, – мяркуе іншая карыстальніца.
«Таму што за капейкі сёлета пасуткава здаем ужо, ніколі такога не было, нявопытныя пачаткоўцы абвалілі рынак на шкоду сабе і ўсім, таму шмат хто сыходзіць у доўгатэрмін… Ну нічога, палічаць усе выдаткі і дойдзе можа хутка, што працаваць за дзякуй ну такое сабе…» – уключаецца ў абмеркаванне мясцовы арэндадаўца.
Чытайце таксама: Дзе знаходзіцца цэнтр горада? Гродзенцы паспрачаліся ў сацсетках
