Пасля адкрыцця пунктаў пропуску «Баброўнікі» («Бераставіца») і «Кузніца» («Брузгі») тут аформілі больш за паўмільёна чалавек і зарэгістравалі амаль 70 тысяч дакументаў у сістэме Tax Free. Аднак беларусы зараз вязуць дадому зусім іншыя тавары, чым гэта было раней, паведамляе Radio Białystok.
Шопінг-турызм змяніўся пасля абмежаванняў
Аб’ёмы пакупак заўважна скараціліся ў параўнанні з папярэднімі гадамі. Асноўнай прычынай сталі санкцыі Еўрапейскага саюза, уведзеныя на фоне вайны Расіі супраць Украіны.
Праз абмежаванні многія тавары, якія раней карысталіся попытам у пакупнікоў з Беларусі, цяпер забароненыя да вывазу праз польска-беларускую мяжу.
Якія тавары патрапілі пад забарону
У санкцыйныя спісы ўвайшоў шырокі пералік прадукцыі, патлумачыў прэс-афіцэр Падляшскай падатковай адміністрацыі Мацей Чарнецкі.
Да забароненых да вывазу з Польшчы тавараў адносяцца электроніка (смартфоны, тэлевізары, камп’ютары), будаўнічыя матэрыялы, бытавая хімія, уключаючы пральныя парашкі, запалкі і іншыя тавары паўсядзённага попыту.
Што цяпер часцей за ўсё купляюць беларусы
Нягледзячы на абмежаванні, за апошнія паўгода Падляшская падатковая адміністрацыя зафіксавала каля 68 тысяч дакументаў Tax Free на агульную суму каля 62 мільёнаў злотых (прыкладна 17 мільёнаў долараў).
Цяпер часцей за ўсё ў дэкларацыях фігуруюць кава і чай, адзенне і цацкі, а таксама дробная бытавая тэхніка і аксесуары (напрыклад, брытвы і мяхі для пыласосаў).
Памежныя пераходы зноў працуюць
Пункты пропуску «Баброўнікі» («Бераставіца») і «Кузніца» («Брузгі») былі зачыненыя на працягу некалькіх гадоў. Польшча адкрыла гэтыя пункты пропуску 17 лістапада 2025 года.
У суседняй краіне адзначалі, што рашэнне пра адкрыццё двух аўтадарожных пунктаў пропуску стала магчымым дзякуючы мадэрнізацыі памежнага бар’ера — як фізічнага, так і электроннага. Паводле ацэнкі польскіх уладаў, быў дасягнуты высокі ўзровень эфектыўнасці аховы мяжы. Гэта дазволіла ўлічыць чаканні грамадства, у тым ліку прадпрымальнікаў, перавозчыкаў і жыхароў, якія ездзяць на працу з Беларусі ў Польшчу.
