У Threads беларус Дзяніс выказаў здзіўленне наконт таго, што ў гасцініцах і гатэлях Гродна ўсе нумары на майскія святы забраніраваны. Ён жартуе, што цяпер давядзецца купляць палатку або шукаць начлег у іншых гарадах вобласці. Hrodna.life праверыў, ці засталіся свабодныя нумары ў гасцініцах Гродна.
Нумары ў модных гатэлях Гродна разабраны
У гасцініцы VS Design Hotel на Урыцкага, 23 ёсць 11 нумароў. Пры спробе забраніраваць начлег для аднаго госця з 1 па 4 траўня сайт паведамляе, што нумароў няма. Аналагічная сітуацыя і на дыяпазон дат з 9 па 11 траўня.
Пачынаючы з 12 траўня свабодныя нумары ў гасцініцы ёсць — прапануецца некалькі варыянтаў коштам ад 581 да 777 руб.
На базе адпачынку «Прывал» у Пышках адшукаць свабодны нумар на травеньскія святы таксама аказалася праблематычна. З 1 па 3 траўня браніраванне недаступнае. Свабодныя нумары ёсць з 4 па 7 траўня, коштам ад 80 да 160 руб. Але ўжо 8 і 9 траўня спыніцца ў «Прывале» не атрымаецца.
У «Кронан Парк Гатэлі» аналагічная сітуацыя: з 1 па 4 траўня даступных нумароў няма. Але пачынаючы з 5 траўня бронь у гатэлі даступная ў любы з дзён. Ноч у «Кронан Парк Гатэлі» каштуе ад 500 да 1030 руб.
Па тэме: Гродзенскі «Кронан Парк Гатэль» прызналі найлепшым гатэлем ў краінах СНД
Не атрымаецца спыніцца і ў апарт-гатэлі «Сямашка» на Калючынскай, 23. Нумары ў гасцініцы забраніраваны з 1 па 9 траўня.
У гатэле The Cult, які нядаўна адкрыўся на месцы гістарычнага будынку, свабодных нумароў з 1 па 3 траўня адшукаць не ўдалося. Месцы таксама забраніраваны на 8 і 9 траўня. У прамежкавых датах ёсць вольныя слоты коштам ад 550 да 750 руб.
У буцік-гатэлі «Новы свет» нумары з 1 па 4 траўня, а таксама на 8 і 9 траўня забраніраваны. Пачынаючы з 12 траўня можна абраць пакой за 280 руб.
«Нёман», «Славія» і «Турыст» гатовы прымаць гасцей
У гасцінічным комплексе «Турыст» засталося некалькі свабодных слотаў на травеньскія святы. Нумары коштам ад 90 да 104 руб. даступныя 1, 3, 4 і 5 траўня. Таксама спыніцца ў гатэлі можна ў ноч з 8 на 9 траўня.
У гасцініцы «Славія» з 1 па 4 траўня прапануюць адразу некалькі варыянтаў на выбар: нумар для маладых за 990 руб., люкс-нумар за 250 руб. і апартаменты на Траецкай за 150 руб.
У гатэлі «Нёман» нумары даступныя ўвесь месяц, цалкам забраніравана толькі адна дата — 17 траўня. За ноч у гатэлі давядзецца аддаць ад 170 да 280 руб.
Чытайце таксама: У Гродне на «травеньскія» ў паўтара раза выраслі цэны на арэнду кватэры
