У Камітэта дзяржаўнага кантролю (КДК) ёсць доказы датычнасьці экс-кіраўніка Белгазпрамбанка Віктара Бабарыкі да супрацьпраўнай дзейнасці, паведаміў старшыня КДК Іван Церцель, піша БЕЛТА.
Дэпартамент фінансавых расследаванняў КДК распачаў дзве крымінальныя справы:
- арт.235 КК (легалізацыя сродкаў, здабытых злачынным шляхам у асабліва буйным памеры)
- арт.243 КК (ухіленне ад выплаты падаткаў у асабліва буйным памеры).
Праверку ДФР праводзіў з 2016 года. Правяралі дзеючых і былых топ-менеджараў і работнікаў Белгазпрамбанка. Замежныя партнёры далі доказы, што работнікі стварылі арганізаваную злачынную групу, якая выводзіла грошы за мяжу.
«Не магу сабе ўявіць, што тое, што рабілася ў банку намеснікамі, магло быць невядома кіраўніку. Магу пацвердзіць, што ў цяперашні час у нас маюцца пераканаўчыя доказы яго дачынення да дадзенай супрацьпраўнай дзейнасці», — сказаў Іван Церцель.
У цяперашні час затрыманыя 15 чалавек. Гэта топ-менеджары, у тым ліку намеснікі кіраўніка банка, кіраўнікі рознага ўзроўню, а таксама прадстаўнікі камерцыйных структур (у асноўным былыя супрацоўнікі банка).
Большасць затрыманых супрацоўнічаюць са следствам, даюць прызнальныя паказанні. 11 чэрвеня канфіскавалі больш за $ 4 млн, а таксама каштоўныя паперы на суму звыш $ 500 тыс., выяўленыя і далучаны да матэрыялаў так званыя дзігіпасы (інструмент, які дазваляе кіраваць рахункамі ў замежных банках). Расследаванне працягваецца.
Лукашэнка: «Гэта адна шайка-лейка»
Аляксандр Лукашэнка расказаў, што па дарозе на сустрэчу ў Полацк у верталёце прачытаў асноўныя матэрыялы ў адносiнах да банка і заявы. «Што мяне ўразіла: гэты нягоднік, інакш не назаву: я, маўляў, ні пры чым, да мяне прэтэнзій ніхто не мае, гэта яны там…», — заўважыў кіраўнік дзяржавы.
- «Слухайце, яны ўсе былі не толькі ў яго намесьнікамі. Гэта адна шайка-лейка. Мы гэта бачым з 2016 года. Мы гэта бачылі. Навошта ж ты на іх валіш сёння. Ты быў кіраўніком, яны ў цябе намесьнікамі. І ўсё, што там тварылася, магло без кіраўніка адбывацца? Не», — адзначыў Аляксандр Лукашэнка.
- «Калі рыльца ў пушку, не лезь туды. Таму што цябе змардуе сам народ. Чаго палез — таму што зразумеў, што да яго прыйдуць і надзенуць кайданкі. А ў нас жа цяпер выгадна займацца палітыкай, каб стаць вязнем сумлення. Вось чаму ён пайшоў туды. Але гэта яму не дапаможа», — заявіў Лукашэнка.
- «І я хачу, каб ён трапіў на выбары. Каб ён прыйшоў і расказаў, адкуль маёмасць на Кіпры, як пры такой „лукашэнкаўскай дыктатуры“ ён стварыў гэтую ўласнасць, як ён хабары даваў, дзяліў грошы, чаму замежны банк гэтым займаўся… гэта ўсё трэба распавесці беларусам. І яны няхай потым вызначацца. Але вязнем сумлення мы яго не зробім», — сказаў прэзідэнт.
- «Вы не думайце, што там з боку Лукашэнкі нейкі накат. Ніякага накату няма. Мне гэта цяпер і не трэба было», — запэўніў беларускі лідар.
- «Праўда і толькі праўда! Другое — усё, што скраў, вярні народу. Можа быць, суд гэта ўлічыць». «А старшыні КДК, які займаецца гэтым пытаннем, я даручыў, каб ён народу ўсё выклаў, распавёў што ёсць. Каб яны не думалі, што тут ідзе нейкі штучны накат. Нам ён не патрэбны», — рэзюмаваў прэзідэнт.
Што адбылося?
11 чэрвеня ў галаўны офіс Белгазпрамбанка прыйшлі супрацоўнікі Дэпартамента фінансавых расследаванняў Камітэта дзяржкантролю для ажыццяўлення працэсуальных дзеянняў у дачыненні да шэрагу юрыдычных і фізічных асоб, паведаміла прэс-служба банка. Сілавікі правяралі банк да позняй ночы.
Прэс-служба Белгазпрамбанка заявіла, што гэтыя падзеі не паўплываюць на фінансавую ўстойлівасць банка, выкананне прынятых абавязацельстваў і абслугоўванне кліентаў, плацяжы якіх ажыццяўляюцца ў звычайным рэжыме, піша T*T.BY.
Віктар Бабарыка: «Штаб гэта не закранае»
Віктар Бабарыка сказаў, што банк будзе разбірацца са сваімі справамі, а штаб гэта не закранае. Тым не менш, ён гатовы да таго, што нехта можа сысці з кампаніі:
— Той, хто ўсё-такі вырашыць, што гэта для яго ўяўляе нейкую персанальную пагрозу, мае абсалютна поўнае права ўстаць і сысці. І я шчыра скажу, я буду ўсім удзячны, незалежна ад таго, якое будзе далейшае дзеянне. Вы зрабілі ўжо вельмі шмат. Застанецеся або сыдзеце — усё роўна на карысць нашай справе.
Бабарыка лічыць, што тое, што адбываецца, — гэта ціск на яго, у тым ліку фармаванне комплексу віны за людзей, «якія паверылі і пайшлі». «Мне не вельмі прыемна гэта пачуццё, я скажу вам шчыра. Але я да яго рыхтаваўся, я гэта разумею», — сказаў Віктар Бабарыка.
