У гродзенскай гарадской паліклініцы № 4 будуць праводзіць анлайн-кансультацыі праз Skype. Дзякуючы гэтаму можна будзе звярнуцца да вузкіх спецыялістаў, не наведваючы паліклініку.
Онлайн-кансультаванне ў паліклініцы пачне працаваць у бліжэйшыя дні, паведамляе тэлеканал «Гродно Плюс».
Новаўвядзенне стала магчымым дзякуючы спонсарскай дапамозе ў выглядзе 25 комплексаў па анлайн-кансультаванню, распавяла Ларыса Кучук, галоўны ўрач паліклінікі. Па skype будуць кансультаваць хірург, уролаг, анколаг, траўматолаг. Калі ж спатрэбіцца агляд, можна будзе прыйсці і асабіста.
Як працуе паліклініка цяпер
На ўсіх паверхах паліклінікі каля лесвіцы размешчаны дазатары з дэзсродкамі. Апрацаваць рукі можна яшчэ на вуліцы перад уваходам, і на выхадзе, арганізаваным праз асобныя дзверы. Пры ўваходзе работніцы паліклінікі мераюць наведвальнікам тэмпературу бескантактавым тэрмометрам, пытаюцца, куды ідзе пацыент. Абавязкова павінна быць маска, калі не — выдадуць. У даведачнай сочаць за дыстанцыяй у чарзе. Талон на флюараграфію ўзяць няцяжка, вялікіх чэргаў пад кабінетамі няма, на лаўках расклееныя напамінкі аб сацыяльнай дыстанцыі. Усе медыкі - у масках і пальчатках, некаторыя — з ахоўнымі экранамі, але ёсць і ў звычайных марлевых павязках.
Усіх хворых з тэмпературай накіроўваюць у асобны ўваход, дзе да пандэміі быў дзённы стацыянар. Там таксама ёсць дазатар з дэзсродкам, адмысловы кілімок для дэзінфекцыі падэшваў, як і ў асноўным вестыбюлі. Людзей няшмат. Там жа — асобны кабінет для забору крыві ў пацыентаў з рэспіраторнымі захворваннямі, праўда, бяруць толькі агульны аналіз з пальца.
У паліклініцы кажуць, што цяпер многія звяртаюцца з субфебрыльнай тэмпературай, якая трымаецца некалькі тыдняў. Дыстанцыю і масачны рэжым пры наведванні паліклінікі вытрымліваць сапраўды варта. На прыёме наш журналіст пераканаўся, што бескантактавыя тэрмометры могуць працаваць з хібнасцю: калі электронны паказвае 37,2˚, бескантактавы — 36,6˚.
Чытайце таксама: Да 18 выклікаў на дзень. Як змянілася работа ўрача ў паліклініцы праз каранавірус
Паводле афіцыйных звестак Міністэрства аховы здароўя, па стане на 11 лютага ў Беларусі пацверджана 263 551 выпадак каранавіруса (1692 за апошнія суткі), ачунялі і выпісаны 252 068 (1990 за апошнія суткі) пацыентаў, памёрлі 1820 чалавек (9 за апошнія суткі).
